गणपती विसर्जनावेळी अनर्थ टळला! ,चोपडा रोडच्या खदाणीत पिता-पुत्र पडले; अग्निशमन दल व आरोग्य पथकाच्या तत्परतेने दोघांचे प्राण वाचले

अमळनेर प्रतिनिधी

गणेशोत्सवाच्या नवव्या दिवशी श्री गणपती विसर्जनासाठी चोपडा रोड येथील खदाणीजवळ नागरिकांची मोठी गर्दी असताना अचानक पिता-पुत्र खदाणीतील पाण्यात पडल्याची घटना घडली. मात्र घटनास्थळी तैनात असलेल्या नगरपालिका आरोग्य विभागाचे पथक आणि अग्निशमन दलाच्या जवानांनी क्षणाचाही विलंब न करता बचावकार्य सुरू केल्याने पिता-पुत्रांना सुखरूप बाहेर काढण्यात यश आले. त्यामुळे संभाव्य मोठी दुर्घटना टळली.

गणपती विसर्जनासाठी आलेले एक नागरिक आणि त्यांचा अंदाजे १० ते ११ वर्षांचा मुलगा विसर्जन करीत असताना अचानक वडिलांचा पाय घसरला. त्यावेळी वडिलांनी मुलाचा हात धरलेला असल्याने दोघेही खदाणीतील पाण्यात पडले.

घटना निदर्शनास येताच सुरक्षेसाठी घटनास्थळी तैनात असलेल्या नगरपालिकेच्या आरोग्य विभागाच्या कर्मचाऱ्यांनी तसेच अग्निशमन दलाच्या जवानांनी तातडीने धाव घेतली. अत्यंत सतर्कता, धाडस आणि समन्वयाने बचावकार्य राबवून दोघांनाही पाण्यातून सुखरूप बाहेर काढण्यात आले.

तत्पर यंत्रणेमुळे मोठा अनर्थ टळला

गणपती विसर्जनाच्या कालावधीत संबंधित यंत्रणा घटनास्थळी सज्ज असल्याने आपत्कालीन परिस्थितीत तातडीने मदत मिळाली. आरोग्य विभागाचे पथक आणि अग्निशमन दलाच्या जवानांच्या कार्यतत्परतेमुळे पिता-पुत्रांचे प्राण वाचले.

या बचावकार्यात दाखविलेली तत्परता, सतर्कता आणि परस्पर समन्वय प्रशंसनीय ठरला. विसर्जनस्थळी आपत्कालीन पथकांची उपस्थिती किती महत्त्वाची आहे, हे या घटनेतून पुन्हा अधोरेखित झाले.

“क्षणाची तत्परता ठरली जीवनदायी; पिता-पुत्र सुखरूप बचावले!”

अमळनेर नगर परिषदेचे नगराध्यक्ष डॉ परीक्षित बाविस्कर, उपनगराध्यक्ष प्रशांतजी निकम व नगरसेवक यांनीअग्निशमन दल व आरोग्य पथकाचे धन्यवाद व्यक्त केले..