माहिती अधिकार दिनानिमित्त महात्मा फुले हायस्कूल मध्ये जनजागृती

अमळनेर प्रतिनिधी

देवगाव, ता. अमळनेर : महात्मा जोतीराव फुले हायस्कूल, देवगाव येथे २८ सप्टेंबर जागतिक माहिती अधिकार दिनानिमित्त जनजागृतीपर कार्यक्रमाचे आयोजन करण्यात आले. कार्यक्रमाच्या अध्यक्षस्थानी शाळेचे मुख्याध्यापक अनिल महाजन होते, तर प्रमुख अतिथी म्हणून एच. ओ. माळी उपस्थित होते.

यावेळी शाळेचे सांस्कृतिक प्रतिनिधी आय. आर. महाजन यांनी माहिती अधिकार दिनाचे महत्त्व आणि माहितीचा अधिकार अधिनियमाबाबत सविस्तर मार्गदर्शन केले.

ते म्हणाले, २८ सप्टेंबर हा जागतिक माहिती अधिकार दिन नागरिकांना माहिती जाणून घेण्याच्या अधिकाराची तसेच पारदर्शक प्रशासनाच्या महत्त्वाची जाणीव करून देणारा दिवस आहे. माहितीचा अधिकार हा केवळ कागदावरील कायदा नसून लोकशाही अधिक पारदर्शक, उत्तरदायी आणि लोकाभिमुख करण्याचे प्रभावी माध्यम आहे.

शासनाच्या कामकाजाबाबत नागरिकांना माहिती उपलब्ध झाल्याने प्रश्न विचारण्याची, योग्य माहितीच्या आधारे भूमिका मांडण्याची आणि सार्वजनिक कामकाजावर लक्ष ठेवण्याची संधी मिळते. भारतात माहितीचा अधिकार अधिनियम, २००५ लागू झाल्यानंतर सामान्य नागरिकांच्या हातात प्रशासनाकडून माहिती मागण्याचे कायदेशीर माध्यम उपलब्ध झाले. मात्र या अधिकाराचा वापर जबाबदारीने, कायदेशीर चौकटीत आणि जनहिताच्या दृष्टीने करणेही तितकेच महत्त्वाचे असल्याचे त्यांनी स्पष्ट केले.

कार्यक्रमाचे आभार स्काऊट शिक्षक एच. ओ. माळी यांनी मानले. कार्यक्रमाच्या यशस्वीतेसाठी शाळेतील शिक्षकेत्तर कर्मचाऱ्यांनी परिश्रम घेतले.