नारळात दिसले गणरायाचे मुख! भडणे येथील देसले कुटुंबीयांचा भाविकांना अनोखा अनुभव; विसर्जनावेळी भक्तिमय वातावरण

भडणे (ता. शिंदखेडा) प्रतिनिधी
हिंदू संस्कृतीत श्रद्धेने आणि उत्साहाने साजरा होणारा गणेशोत्सव भडणे येथील एका शेतकरी कुटुंबासाठी यंदा अविस्मरणीय ठरला. गणरायाच्या विसर्जनावेळी नारळ फोडण्यासाठी तयार करत असताना नारळाच्या आतील भागात गणरायाच्या मूर्तीप्रमाणे मुखाकृती आणि लांब सोंडेसदृश आकार दिसून आल्याने उपस्थित भाविकांमध्ये कुतूहल आणि भक्तिभावाचे वातावरण निर्माण झाले.
भडणे येथील शेतकरी ज्ञानेश्वर पंढरीनाथ देसले यांनी यावर्षी नवीन वास्तूचे बांधकाम केल्याने आपल्या राहत्या घरी अकरा दिवस गणरायाची स्थापना केली होती. अकरा दिवस सकाळ-संध्याकाळ नियमित आरती, भजन तसेच विधिवत पूजा-अर्चा करण्यात आली. ज्ञानेश्वर पाटील व सौ. वैशाली पाटील हे स्वामींचे भक्त असून त्यांनी अत्यंत श्रद्धेने गणरायाची सेवा केली.
अनंत चतुर्दशीच्या दिवशी गणरायाला निरोप देण्याची वेळ आली. विसर्जनापूर्वी नारळ फोडण्यासाठी तो तयार करत असताना त्यामध्ये गणरायाच्या मुखासारखी आकृती व लांब सोंड दिसून आली. हा अनोखा अनुभव पाहण्यासाठी उपस्थित भाविकांनी गर्दी केली आणि भक्तिभावाने गणरायाचे दर्शन घेतले. त्यानंतर भाविकांच्या उपस्थितीत गणरायाला भावपूर्ण निरोप देण्यात आला.
या घटनेची परिसरात चर्चा रंगली असून, देसले कुटुंबीयांसाठी हा गणेशोत्सवाचा अविस्मरणीय आणि भावनिक अनुभव ठरला आहे.
चौकट |
भाविकांचा विश्वास
> “भगवंतावर असलेली श्रद्धा, निष्ठा आणि प्रामाणिक सेवा यामुळेच आमच्या कुटुंबाला गणरायाचे दर्शन झाले. या अनुभवाने मनाला मोठे समाधान मिळाले.”
— ज्ञानेश्वर पाटील व सौ. वैशाली पाटील, भडणे
ईश्वर रामदास महाजन
मुख्य संपादक

संबंधित बातम्या
जुनी पेन्शनसाठी मंत्रालयात दिवसभर धावपळ; मुख्यमंत्रीांसह मंत...
ग्रामीण मातीतून प्रशासकीय शिखराकडे; निलेश भदाणे यांची प्रेरण...
पुण्यात राष्ट्रीय समाज पक्षाचे दोन दिवसीय सोशल मीडिया प्रबोध...
धरणगावचे श्री राहुल सुरेंद्र जैन यांना 'समाज रत्न सम्मान 202...