गणपतीचा प्रसाद ठरला शैक्षणिक मदतीचा आधार! नंदिनीबाई वामनराव मुलींचे विद्यालयात गरजू विद्यार्थिनींना शालेय साहित्याचे वाटप

जळगाव प्रतिनिधी :

गणेशोत्सवाच्या मंगलमय पर्वाचे औचित्य साधत जळगाव येथील नंदिनीबाई वामनराव मुलींचे विद्यालय व कनिष्ठ महाविद्यालयात गरजू व आर्थिकदृष्ट्या दुर्बल विद्यार्थिनींना शालेय साहित्याचे वाटप करण्यात आले. गणपतीचा प्रसाद म्हणून शालेय साहित्य देण्याच्या या अभिनव उपक्रमातून विद्यार्थिनींच्या शैक्षणिक प्रगतीला हातभार लावण्याचा स्तुत्य प्रयत्न करण्यात आला.

विद्यालयात दरवर्षी गणेशोत्सवानिमित्त विद्यार्थिनींच्या हस्ते तयार करण्यात आलेल्या गणपतीची स्थापना केली जाते. त्यानिमित्त कार्यालयाच्या वतीने एका दिवशी विद्यार्थिनींना विविध स्वरूपाचा प्रसाद दिला जातो. यंदा मात्र या परंपरेला सामाजिक आणि शैक्षणिक उपक्रमाची जोड देत ‘प्रसाद म्हणून शालेय साहित्य’ देण्याची नाविन्यपूर्ण संकल्पना राबविण्यात आली.

गरजू विद्यार्थिनींना शैक्षणिक साहित्य मिळावे, त्यांना शिक्षणासाठी प्रोत्साहन मिळावे आणि त्यांच्या शैक्षणिक प्रगतीला चालना मिळावी, या उद्देशाने आवश्यक शालेय साहित्याचे वाटप करण्यात आले.

या उपक्रमांतर्गत विद्यालय व कनिष्ठ महाविद्यालयाच्या प्राचार्या श्रीमती सुलभा मुरलीधर राणे, उपप्राचार्या सौ. सुजाता सुनील नेमाडे, श्री. प्रदीप वाणी, पर्यवेक्षिका सौ. भारती संजय राणे, श्री. विज्ञान सिताराम सैदाणे आणि कार्यालय प्रमुख श्री. संदीप डोलारे यांच्या शुभहस्ते विद्यार्थिनींना शालेय साहित्याचे वाटप करण्यात आले.

या उपक्रमासाठी वरिष्ठ लिपिक श्री. सागर गाजरे, कनिष्ठ लिपिक श्री. सर्वेश चौधरी, सौ. कीर्ती कोल्हे आणि सौ. वैशाली चौधरी यांनी सहकार्य केले.

गणेशोत्सवातील प्रसादाला सामाजिक बांधिलकीची जोड देत राबविण्यात आलेल्या या उपक्रमातून ‘उत्सवातून आनंद आणि शिक्षणातून भविष्य’ असा सकारात्मक संदेश देण्यात आला.