जुनी पेन्शन मिळेपर्यंत लढा सुरूच!” ,२८ सप्टेंबरपासून बेमुदत धरणे; भुसावळ तालुक्यात शिक्षक-शिक्षकेतर कर्मचाऱ्यांची निर्णायक बैठक

भुसावळ प्रतिनिधी :

१ नोव्हेंबर २००५ पूर्वी नियुक्त झालेल्या आणि नंतर १०० टक्के अनुदानावर आलेल्या शिक्षक व शिक्षकेतर कर्मचाऱ्यांना जुनी पेन्शन योजना लागू करावी, या मागणीसाठी दि. २८ सप्टेंबर २०२६ पासून बेमुदत धरणे आंदोलन करण्यात येणार आहे. या आंदोलनाच्या तयारीसाठी भुसावळ तालुक्यातील शिक्षक-शिक्षकेतर कर्मचाऱ्यांची बैठक माध्यमिक शिक्षक पतपेढी, भुसावळ येथे पार पडली.

बैठकीत मुख्यमंत्र्यांना निवेदन पाठविणे, स्थानिक आमदारांकडून समर्थनपत्र मिळविणे तसेच या प्रश्नावर सकारात्मक निर्णयासाठी आंदोलनात मोठ्या संख्येने सहभागी होण्याबाबत चर्चा करण्यात आली. तालुक्यातील विविध शाळांमधील शिक्षक व शिक्षकेतर कर्मचारी बैठकीस उपस्थित होते.

बैठकीच्या अध्यक्षस्थानी आप्पासाहेब संभाजी पाटील होते. सूत्रसंचालन दिलीप सुरवाडे यांनी केले, तर प्रास्ताविक जगताप सर यांनी केले.

यावेळी अपर्णा पाटील, सैदाणे मॅडम, निकाळजे मॅडम, राजेश येवले, आर. ओ. चौधरी, विनोद चौधरी, प्रशांत चौधरी, प्रशांत राणे, जितेंद्र बोंम्बे, सुनील चौधरी, प्रताप घोगरे, महाजन सर तसेच महाराष्ट्र राज्य जुनी पेन्शन समन्वयक संघाचे समन्वयक डॉ. शांताराम पाटील यांनी मार्गदर्शन केले. आझाद मैदानावरील आंदोलनात सहभागी होण्याबाबत उपस्थितांना माहिती देण्यात आली.

यावेळी संभाजी आप्पा पाटील यांनी मार्गदर्शन करताना, “हे शेवटचे आंदोलन आहे, त्यामुळे सर्वांनी मोठ्या संख्येने सहभागी व्हावे,” असे आवाहन केले. जुन्या पेन्शनच्या मागणीसाठी आंदोलनाच्या माध्यमातून शासनाचे लक्ष वेधण्याचा निर्णय बैठकीत व्यक्त करण्यात आला.