शब्दांना चिंतनाची धार, वक्तृत्वाला सादरीकरणाची साथ! , “चिंतन, उच्चारण अन् सादरीकरण; वक्तृत्व यशाचे त्रिसूत्र!” — प्रा. वा. ना. आंधळे

शहादा प्रतिनिधी :

वक्तृत्व म्हणजे केवळ प्रभावी बोलण्याची कला नव्हे, तर विचारांना शब्दांची ताकद देत श्रोत्यांच्या हृदयापर्यंत पोहोचविण्याचे प्रभावी माध्यम आहे. विषयाचे सखोल चिंतन, सुस्पष्ट उच्चारण आणि साभिनय सादरीकरण या त्रिसूत्रीचा मेळ साधला, तर वक्तृत्वाला निश्चितच वेगळी उंची प्राप्त होते. स्पर्धेत कोणता क्रमांक मिळतो यापेक्षा आपल्या चिंतनातून स्वतःला आणि उपस्थितांना आनंद मिळतो का, याचा विचार करणे अधिक महत्त्वाचे आहे. हाच विचार विद्यार्थ्यांना सातत्याने यशाच्या दिशेने घेऊन जाईल, असे प्रतिपादन कवी प्रा. वा. ना. आंधळे यांनी केले.

पूज्य साने गुरूजी विद्या प्रसारक मंडळ आणि श्री. पी. के. अण्णा पाटील फाउंडेशन यांच्या वतीने आयोजित आंतरमहाविद्यालयीन विभागीय पुरुषोत्तम वक्तृत्व स्पर्धेच्या पारितोषिक वितरण समारंभात परीक्षक म्हणून ते बोलत होते.

पारितोषिक वितरण समारंभ नंदुरबार जिल्हा परिषदेच्या माजी शिक्षण व आरोग्य सभापती सौ. जयश्रीबेन दीपक पाटील यांच्या हस्ते संपन्न झाला. यावेळी संयोजन समितीचे अध्यक्ष तथा माजी प्राचार्य डॉ. विश्वासराव पाटील, कार्याध्यक्ष डॉ. सुनील पवार, वरिष्ठ महाविद्यालयाचे प्राचार्य डॉ. मिलिंद पटेल यांच्यासह विविध विद्याशाखांचे प्राचार्य उपस्थित होते.

 शिवानी मोर्याची बाजी

या वक्तृत्व स्पर्धेत शिरपूर येथील आर. सी. पटेल फार्मसी कॉलेजची शिवानी रमेश मोर्या हिने आपल्या प्रभावी वक्तृत्वाच्या जोरावर प्रथम क्रमांक पटकावला.

पूज्य साने गुरुजी विद्या प्रसारक मंडळाच्या वरिष्ठ महाविद्यालयाची (शहादा) फातिमा मोहम्मद रफीक इसानी हिने द्वितीय क्रमांक मिळविला, तर आर. सी. पटेल इन्स्टिट्यूट ऑफ फार्मसी (शिरपूर) येथील बेग नशराह मोहम्मद अली हिने तृतीय क्रमांक पटकावला.

याशिवाय एम. जे. कॉलेज, जळगावची ऐश्वर्या प्रल्हाद पाटील आणि विधी महाविद्यालय, नाशिकचा कल्पेश संजय माळी यांना उत्तेजनार्थ पारितोषिक देऊन गौरविण्यात आले.

सर्व विजेत्यांना मान्यवरांच्या हस्ते रोख पारितोषिक व स्मृतिचिन्ह प्रदान करून सन्मानित करण्यात आले.

विद्यार्थ्यांच्या वक्तृत्वाला मिळाली दाद

स्पर्धेचे यशस्वी आयोजन मंडळाचे समन्वयक प्रा. मकरंद पाटील यांच्या मार्गदर्शनाखाली करण्यात आले. स्पर्धेत उल्लेखनीय यश संपादन करणाऱ्या विद्यार्थ्यांचे मंडळाचे अध्यक्ष बापूसाहेब दीपकभाई पाटील, उपाध्यक्ष जगदीश पाटील तसेच संचालक मंडळाने अभिनंदन केले.

कार्यक्रमाचे सूत्रसंचालन प्रा. डॉ. विजय प्रकाश शर्मा यांनी केले, तर आभार प्रदर्शन प्रा. डॉ. चंद्रशेखर सुतार यांनी केले.

विचारांची खोली, शब्दांची ताकद आणि सादरीकरणाची प्रभावी शैली यांचा संगम साधणाऱ्या या स्पर्धेत विद्यार्थ्यांच्या वक्तृत्वकौशल्याला मिळालेली दाद त्यांच्या भावी वाटचालीसाठी प्रेरणादायी ठरली.